जिफन्टको लक्ष्य
"श्रमजीवी वर्गको मर्यादित, समृद्ध र सिर्जनशील जीवन" हाम्रो लक्ष्य हो । "सम्मानित श्रमजीवी वर्ग र समृद्ध जीवनको लागि समाजवाद" नेपाल ट्रेड यूनियन महासंघको लक्ष्य प्रतिविम्वित गर्ने नारा हो ।जिफन्टको ध्येय
नेपाली समाजमा विद्यमान सामन्ती उत्पादन सम्बन्ध अन्त्य गरी समाजवादी उत्पादन सम्बन्ध स्थापित गर्नु जिफन्टको उद्देश्य हो । यो उद्देश्य प्राप्तिको लागि नीति निर्माण प्रक्रिया र राजनीतिक निर्णयको प्रक्रियामा प्रभाव पार्न सक्ने तुल्याउन, श्रमिकलाई क्षमता अभिवृद्धि गर्दै शिक्षित र सङ्गठित गरिने छ । श्रमिकका मौलिक हक सहित विश्वव्यापी घोषणामा परेका मानव अधिकार प्राप्तिको सन्दर्भमा अन्तर्राष्ट्रिय ऐक्यबद्धता पनि परिचालन गरिने छ ।
दिगो शान्ति, स्थिरता र वर्ग आधारित समावेशी सहभागितामूलक लोकतन्त्र जिफन्टले जोड दिने गरेको तीन वटा प्रमुख पक्षहरू हुन् ।
जिफन्टको मूल उद्देश्य
राज्यको सम्पूर्ण अङ्गमा श्रमजीवी वर्गको महत्वपूर्ण संलग्नता हुने गरी संघीय लोकतान्त्रिक गणतन्त्र स्थापना र सुदृढ गर्ने।
जिफन्टका अन्य उद्देश्य
- वर्ग दृष्टिकोण सहित सामाजिक रूपान्तरणको संघर्षलाई निरन्तरता दिने
- श्रमिक अधिकारको प्रवर्धन, सुरक्षा तथा परिपूर्ति गर्नका लागि नीति निर्माणको वातावरण सिर्जना गर्ने
- एकल यूनियनको निर्माण गरी एकीकृत ट्रेड यूनियन आन्दोलनको अवधारणालाई साकार पार्ने
- सबैका लागि मर्यादित काम सुनिश्चित गर्ने
